Педагагічныя чытанні

...Дык шануй, беларус, сваю мову —

Гэта скарб нам на вечныя годы;

За пашану радзімаму слову

Ушануюць нас брацця-народы!

Гэтыя словы знакамітага беларускага пісьменніка Алеся Гаруна сталі агульнай тэмай абласнога мерапрыемства - “Педагагічныя чытанні выкладчыкаў беларускай мовы і літаратуры”, якое прайшло 28 лістапада 2018 года на базе ўстановы адукацыі “Пінскі дзяржаўны прафесіянальны ліцэй сельскагаспадарчай вытворчасці”.

У пачатку мерапрыемства з прывітальнымі словамі да прысутных звярнуліся дырэктар ліцэя Кузюр Іван Іванавіч і метадыст дзяржаўнай установы “Брэсцкі абласны вучэбна-метадычны цэнтр прафесійнай адукацыі” Шумская Наталля Іосіфаўна.

Выкладчыкі роднай мовы Брэстчыны гаварылі, што кожны народ у працэсе свайго існавання стварыў народныя песні і казкі, прыказкі і прымаўкі, легенды і танцы, але самы галоўны і неад’емны атрыбут кожнага народа – гэта яго мова.

Cёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія — мілагучнасцю. Але ў кожнага чалавека ёсць толькі адна мова, якая завецца роднай. Зараз сітуацыя з беларускай мовай даволі складаная – яе любяць, называюць роднай, афіцыйна яна з’яўляецца адной з дзяржаўных моў, але размаўляюць на ёй адзінкі. Часцей за ўсё яе выкарыстоўваюць толькі настаўнікі, а вучні і на ўроках спрабуюць падмяніць свае адказы рускім варыянтам.

Цікавае, змястоўнае і карыснае мерапрыемства наведалі каля трыццаці педагогаў устаноў прафесіянальна-тэхнічнай і сярэдняй спецыяльнай адукацыі Брэсцкай вобласці. У цёплай сяброўскай атмасферы калегі дзяліліся вопытам, праводзілі прэзентацыі нетрадыцыйных урокаў, выкарыстоўваючы інфармацыйна-камунікатыўныя тэхналогіі. Удзельнікі мерапрыемства падкрэслівалі важнасць захавання роднай мовы, заклікалі не саромецца і  аберагаць яе, бо мова — гэта тое, без чаго не можа жыць ніводзін чалавек.